6 communication

យុទ្ធសាស្ត្រ​ចំនួន​៦ ​ធ្វើ​​ឲ្យ​អ្នក​ក្លាយ​ជា​អ្នក​ទំនាក់ទំនង​ដ៏​​ពូកែ

Business group meeting

ជា​ទូទៅ​ការ​និយាយ​ប្រស្រ័យ​ទំនាក់ទំនង​​ប្រចាំ​ថ្ងៃ​មិនមែន​សុទ្ធតែ​ធ្វើ​ឲ្យ​បុគ្គល​ម្នាក់​ក្លាយ​ជា​អ្នក​ទំនាក់ទំនង​ដ៏​ពូកែ​មួយ​រូប​បាន​​នោះ​ឡើយ ដែល​នោះ​មិន​ខុស​ពី​​អ្វី​​ដែល​គ្រាន់តែ​ឮ​អ្នកណា​ម្នាក់​និយាយ តែ​​មិន​បាន​​ដឹង​ថា​​​​អ្នកនោះ​កំពុង​និយាយ​​អ្វី​នោះ​ឡើយ​។

តាម​ការ​ពិត​ជាក់​ស្ដែង បុគ្គលិក​ដែល​ពូកែ​ស្ដាប់​ត្រូវ​បាន​គេ​ចាត់​ទុក​ថា ក៏​ជា​បុគ្គល​ម្នាក់​ដែល​ពូកែ​ទំនាក់ទំនង​ផង​ដែរ។ នេះ​មិន​នៅ​រាប់​បញ្ចូល​ទាំង​​​យុទ្ធសាស្ត្រ​​​ទាំង​ ៦ ខាងក្រោម​នេះ​ដែល​ជា​គន្លឹះ​ដ៏​សំខាន់​បំផុត​មួយ​​ធ្វើឲ្យ​​បុគ្គល​ម្នាក់​​ក្លាយ​ជា​បុគ្គល​ទំនាក់ទំនង​ដ៏​ពូកែ​ ជា​ពិសេស​នៅ​ក្នុង​វិស័យ​ការងារ​តែម្តង។

១) មាន​ភាព​ម្ចាស់ការ​​ពី​អ្វី​ដែល​​ខ្លួន​​កំពុង​និយាយ
ការ​​ប្រើ​ប្រាស់​ពាក្យ​សម្ដី​ច្បាស់ៗ​​នៅ​ក្នុង​ពេល​និយាយ​គឺ​ជា​លក្ខណៈ​ពិសេស​មួយ​ធ្វើ​ឲ្យ​ភាសា​ទំនាក់ទំនង​របស់​អ្នក​​មាន​ទំនុក​ចិត្ត​ឡើង​។ ប៉ុន្តែ​អ្វី​ដែល​សំខាន់​ជាង​នេះ​ទៅ​ទៀត​​នោះ​គឺ ភាព​​ម្ចាស់ការ​លើ​អ្វី​ដែល​អ្នក​កំពុង​និយាយ​តែម្តង។

អ្នក​ត្រូវ​ដឹង​ថា តើ​អ្នក​កំពុង​និយាយ​អ្វី? និយាយ​ទៅ​កាន់​អ្នកណា​ខ្លះ? តើ​ការ​និយាយ​របស់​អ្នក​ជា​លក្ខណៈ​ពន្យល់ ការពារ​ខ្លួន តស៊ូ មតិ ជា​ការ​និយាយ​ច្រំដែល​ៗ ឬ ជា​ការ​និយាយ​នាំ​ឲ្យ​មាន​ការ​ញុះញង់​​មួយ​? នេះ​ហើយ​ជា​អ្វី​ដែល​ទាមទារ​ឲ្យ​អ្នក​មាន​ភាព​ម្ចាស់ការ​ សម្រាប់​​ចែក​រំលែក​ដល់​មនុស្ស​ជុំវិញ​ខ្លួន។ លើស​ពី​នេះ​ទៅ​ទៀត អ្នក​​ក៏​មាន​ស្វ័យភាព​លើ​ខ្លួន​ ឯង​ផង​ដែរ ដើម្បី​ការ​ពារ​ការ​ទន្ទ្រាន​ដោយ​ពាក្យ​សម្ដី​ពី​អ្នក​ដទៃ និង ដើម្បី​​មាន​អំណះអំណាង​លើ​ហេតុ​ផល​របស់​អ្នក។

​២) សួរ​សំនួរ​ឲ្យ​បាន​ច្រើន
ការ​សួរ​​ទៅ​កាន់​ដៃគូ​សន្ទនា​របស់​អ្នក ​នឹង​ធ្វើ​ឲ្យ​អ្នក​អាច​ស្វែង​យល់​កាន់​ស៊ីជម្រៅ​ពី​ស្ថានភាព និង លទ្ធភាព​របស់​អ្នក​នៅ​ក្នុង​កិច្ចការ​​ទំនាក់ទំនង​មួយ។ បើ​អ្នក​មិន​បាន​សួរ​ឲ្យ​បាន​ដិតដល់​ទេ ចម្ងល់​ជា​ច្រើន​នឹង​បង្កប់​​នៅ​ទី​នោះ ហើយ​ជា​លទ្ធផល​​ចម្លើយ​មួយ​ដែល​អ្នក​ចង់​បាន​នៅ​តែ​ស្រពិចស្រពិល​ដដែល។

ជា​​​ប្រកា​ល្អ​អ្នក​អាច​លើក​ជា​សំនួរ​ឡើង​ដូច្នេះ​ថា៖
-តើ​បញ្ហា​នេះ​ធ្វើ​ឲ្យ​អ្នក​មាន​អារម្មណ៍​បែប​ណា?
-តើ​អ្វី​ទៅ​ជា​រឿង​អាក្រក់​បំផុត​សម្រាប់​អ្នក?
-តើ​អ្នក​​កំពុង​ព្យាយាម​ដើម្បី​​អ្វី?
-តើ​អ្នក​ចង់​បាន​អ្វី​ដែល​ល្អ​ជាង​នេះ?

៣) សួរ​​សំនួរ​ដើម្បី​ក្ដោប​​យក​ចម្លើយ​ដែល​​​ច្បាស់​បំផុត
សំនួរ​មួយ​ចំនួន​ដែល​អ្នក​បាន​សួរ​អាច​នៅ​តែ​ជា​ភាព​ស្រពិចស្រពិល ឬ មិន​មាន​ភាព​ច្បាស់លាស់​មិន​អាច​យក​ជា​ការ​បាន ហើយ​បើ​អ្នក​មិន​ច្បាស់​ទេ នោះ​អ្នក​មិន​ដឹង​ថា ដៃគូ​របស់​អ្នក​កំពុង​និយាយ​​ពី​អ្វី​នោះ​ទេ។ ហេតុដូច្នេះ​ហើយ​ ដែល​​មក​ដល់​ចំណុច​នេះ​ អ្នក​ត្រូវ​សាកសួរ​ឡើង​វិញ​ដើម្បី​រក​ចម្លើយ​ណាមួយ​ដែល​ល្អ និង ច្បាស់លាស់​បំផុត។ ​​ជា​ដំណោះស្រាយ​មួយ​​ដ៏​ល្អ អ្នក​អាច​សាកល្បង​ដូច​ជា​និយាយ​​បញ្ជាក់​​ជំនួស​ដៃគូ​អ្នក​ថា “ដូច្នេះ​អ្វី​ដែល​អ្នក​កំពុង​និយាយ​នោះ​គឺ​ថា …” ​ជា​ដើម ព្រោះ​សំនួរ​នេះ​នឹង​បញ្ជាក់​ថា ​​អ្វី​ដែល​អ្នក​បាន​ឭ​ហើយ​លើក​មក​និយាយ​នេះ​​ពិត​ជា​ដូច​អ្វី​ដែល​ដៃគូ​របស់​អ្នក​បាន​និយាយ​ឬ យ៉ាងណា។

៤) ​​យល់​ស្រប​ទស្សនៈ​ដៃគូ​របស់​អ្នក ប៉ុន្តែ​មិន​ទាំងអស់​នោះ​ទេ
ហេតុផល​លើក​ឡើង​នៃ​​ដៃគូ​សន្ទនា​របស់​អ្នក​មិន​ប្រាកដ​ថា សុទ្ធតែ​ត្រូវ​ទាំងអស់​នោះ​ឡើយ ហើយ​អ្នក​ក៏​មិន​ត្រូវ​ចាំ​អង្គុយ​ចាប់​កំហុស​នោះ​ដែរ។ ប៉ុន្តែ​អ្វី​ដែល​​ជា​ការ​​សំខាន់​អ្នក​អាច​យល់​ស្រប​ការ​លើក​ឡើង​ទាំង​នោះ​​​ដែល​ត្រឹមត្រូវ ហើយ​អ្នក​ក៏​អាច​​បដិសេធន៍​​​​ខ្លះៗ​ពី​ទស្សនៈ​​ដៃគូ​សន្ទនា​របស់​អ្នក​​បាន​ដែរ។

យ៉ាងណាមិញ ការ​បដិសេធន៍​របស់​អ្នក​​មិនមែន​ជា​ប្រតិកម្ម​មួយ​ដែល​ធ្វើ​ភ្លាម​ៗ​នោះ​ឡើយ ពោល​គឺ​​អ្នក​ត្រូវ​រង់ចាំ​បន្តិច​សិន ហើយ​​ចាប់​ផ្ដើម​លើក​ហេតុ​ផល​របស់​អ្នក​ជា​ក្រោយ​ដើម្បី​ធ្វើ​ឲ្យ​ដៃគូ​របស់​អ្នក​មាន​អារម្មណ៍​ថា គំនិត ឬ ទស្សន​របស់​គេ​ពិត​ជា​មិន​ត្រឹមត្រូវ​មែន។ ​ចំណាប់​អារម្មណ៍ ឬ ទស្សន​របស់​អ្នក​មិនមែន​ជា​អ្វី​ខុសឆ្គង​វាយ​បំបាក់​មុខ​ដៃគូ​របស់​អ្នក​នោះ​ឡើយ តែ​​នេះ​ជា​ការ​បង្ហាញ​គំនិត​មួយ​ដែល​ដៃគូ​របស់​​អ្នក​​អាច​សាកល្បង​យក​ទៅ​ពិចារណា​​រក​ចម្លើយ​ដែល​ត្រឹមត្រូវ​មួយ​បាន។ ​​​​​

៥) កម្រិត​ព្រំដែន​ទស្សនៈ​របស់​អ្នក
ការ​កំណត់​ព្រំដែន​នៃ​​ការ​បញ្ចេញ​មតិយោបល់​របស់​អ្នក​​ក្នុង​កិច្ច​សន្ទនា ឬ ទំនាក់ទំនង អ្នក​ត្រូវ​ធ្វើ​វា​ឲ្យ​​មាន​កម្រិត​។ ចូរ​ស្រមៃ​បន្តិច​ថា បើ​អ្នក​​ធ្វើ​ឲ្យ​ការ​ទំនាក់ទំនង​របស់​អ្នក​បង្ក​ទៅ​ជា​ការ​ខ្វែង​គំនិត​មួយ​​កាន់តែ​ខ្លាំង​ឡើង នោះ​​វា​លែង​ជា​អ្វី​ដែល​ហៅ​ថា​ការ​ទំនាក់ទំនង​ល្អ​ទៀត​ហើយ។ អ្នក​ត្រូវ​ចេះ​គ្រប់គ្រង​ទស្សន​​របស់​ខ្លួន​ក្នុង​ដែន​កំណត់​មួយ​ទៅ​តាម​អ្វី​ដែល​អ្នក​ដឹង ហើយ​កុំ​ព្យាយាម​និយាយ​ពី​អ្វី​ដែល​អ្នក​ស្រពិចស្រពិល​នោះ​ឡើយ។ អ្នក​អាច​​កំណត់​ព្រំដែន​ទស្សន​របស់​អ្នក​ដោយ​​និយាយ​ដូច្នេះ​ថា៖
-ខ្ញុំ​មិន​ដែល​គិត​បែប​នោះ​ឡើយ!
-ខ្ញុំ​មិន​ដឹង​ថា ​ត្រូវ​ប្រាប់​អ្នក​ពី​អ្វី​នោះ​ឡើយ!
-ខ្ញុំ​មិន​ច្បាស់​ដែរ!
-វា​​គឺ​ជា​រឿង​មួយ​ល្អ​ណាស់ មិន​ថា​អិញ្ចឹង?
-អ្នក​ប្រហែល​ជា​មាន​អ្វី​បន្ថែម​លើស​ពី​នេះ!

៦) ត្រូវ​បញ្ជាក់​​ពី​អ្វី​ដែល​អ្នក​កំពុង​និយាយ​​ទៅ​កាន់​អ្នក​ស្តាប់​
ជំនួស​ឲ្យ​ការ​និយាយ​ថា «តែងតែ» ឬ « មិនដែល» ដែល​​មើល​ទៅ​ហាក់​ដូច​ជា​​មិន​សមរម្យ​នៅ​ក្នុង​ភាសា​ទំនាក់ទំនង អ្នក​ត្រូវ​បញ្ជាក់​ពាក្យ​មួយ​ដែល​មាន​លក្ខណៈ​សមរម្យ​​ជាង​នេះ​ទៅ​ដៃគូ​របស់​អ្នក​​។ ​អ្នក​​អាច​និយាយ​ថា « ខ្ញុំ​​ហាក់​មាន​អារម្មណ៍​ថា អ្នក​មិន​បាន​ស្តាប់​បាន​ច្បាស់​ពី​អ្វី​ដែល​ខ្ញុំ​កំពុង​និយាយ!» ឬ និយាយ​ថា​«ខ្ញុំ​មាន​អារម្មណ៍​ថា អ្នក​​​តែងតែ​ទម្លាក់កំហុស​លើ​ខ្ញុំ​រហូត​!»​

ការ​លើកឡើង​នូវ​ពាក្យពេចន៍​​ទាំង​នេះ ធ្វើ​ឲ្យ​ដៃគូ​ទំនាក់ទំនង​នៃ​កិច្ច​​សន្ទនា​របស់​អ្នក​ចាប់​ផ្ដើម​ចាប់​​បង្វែរ​ចំណាប់​អារម្មណ៍​យកចិត្តទុកដាក់​​លើ​អ្វី​ដែល​អ្នក​និយាយ​​បាន​​កាន់តែ​ច្រើន។ នៅ​ពេល​ដែល​​អ្នក​បញ្ជាក់​ពួកគេ​​​​បាន​កាន់តែ​ច្បាស់ មាន​​ន័យ​ថា សារ​របស់​អ្នក​នឹង​ធ្វើ​ឲ្យ​ពួកគេ​កាន់តែ​យល់​ នោះ​ហើយ​ជា​អ្វី​ដែល​ធ្វើ​ឲ្យ​ការ​ទំនាក់ទំនង​របស់​អ្នក​មាន​តម្លៃ ហើយ​អ្នក​ក៏​ក្លាយ​ជា​អ្នក​​ពូកែ​ទំនាក់ទំនង​ផង​ដែរ៕

Facebookgoogle_pluslinkedinmailby feather

Comments are closed.